مديح الانبا بولا

يا انبا بولا يا اول السواح
يا قديس وبار بتنور كالمصباح
سيرتك نقية جيت هنا بسماح
من رب القوات وقلبك بيه ارتاح
سيبت العالم كله ولا بصيت وراك
وقلبك كان مشغول بالرب اللى فداك
مين زيك يا حبيب دا يسوع هو اللى هداك
تسكن ده المكان وحدك ولا حد معاك
رب القدرة يامر مع كل غروب غراب
معاه نصف خبزة لا اتاخر يوم ولا غاب
ده امر غريب وعجيب تحتار فيه الالباب
طير بيعول انسان لا ده رب الارباب
قرار
+طوباك يا انبا بولا يا حبيب المسيح
يا ضياء منير وجهك حلو ومريح
صلواتك بلسم تشفى القلب الجريح
وصمتك اقوى من كل كلام فصيح
+لما مات ابوه والمال كان عنده كثير
طمع فيه اخوه وقال له انت صغير
نصيبك يبقى قليل ونصيبى انا الكبير
هى دى القسمة اللى لازم تصير
حب ينصفوه من اللى ظلموه
قام راح للقاضى يحكم ما بينه و بينه
قابل فى السكة جنازة وناس يبكوه
رجع فى رايه وساب ماله لاخوه
العالم فيه ايه علشان نتمسك بيه
الكل باطل باطل والعين ما تشبع به
بتجرى ورا ايه نفسك طمعانة فيه
ان دامت لحد تبقى تدوم ليه
انا ايه ينفعنى لو ربحت العالم
واخسر نفسى واعيش فى خصام
الحية زمان اغرت ابونا آدم
وخليته يقع ويعيش فى ظلام
يا رب ارشدنى واهدى سبيلى
وشق لى طريقى وياك يحلى لى
تختاره ايدك ويمينك تسندنى
يارب اسمعنى اسرع و اعنى
ابكى يا انسان على اخوك الانسان
التايه و التعبان المهموم و الحيران
المحتاج لحنان محتاج للامان
قلبه بيصرخ لمكون الاكوان
شوف المكار وحيله مع الابرار
يدخل فكر الناس ويحولهم اشرار
يارب نجينا من شر الغدار
واحفظنا فى اسمك نكون ويا الابرار
لمقبرة راح يبيت فيها و يرتاح
ثلاثة ايام يصلى ويطلب بالحاح
الرب يتحنن ويكتب له النجاح
القرار مش سهل ويحتاج لايضاح
ظهر له ملاك قواه وعزاه
ارشده للبرية صحبه وصار معاه
وصلوا المكان فرح لما راه
هنا نام على الصخر واتغطى بسماه
بدا جهاده صوم وصلاة ودموع
نسك وطهارة وسجود بخشوع
يتحمل البرد ويصبر على الجوع
ياكل نصف خبزه ويشرب من الينبوع
مت عن العالم فمك ما داق طعام
عينك ما شافت انسان ناظرةلله دايما
ورجليك الطاهرة ما تركته لحظة
حتى اتقال عنها الارض نالت بركة
لبست ثوب الليف على جسدك النحيف
وصار حمله خفيف عشت غريب و ضيف
ظلام المغارة انار بصلوات البار
تشهد لك بوقار سيرة مملوءة فخار
يا موسي فى البرية يا ايليا الجديد
يا داود الوديع يا يوحنا العتيد
تركت غنى العالم نلت الكنز الاكيد
كان حبك لالهك كل يوم يزيد
بخور طيبك قد فاح ملا الدنيا افراح
لولاك ما نزل مطر ولا ندى يحيي الارواح
وفى اوانه النيل يفيض يروى الارض براح
ومعاك الخير يجى يحتار فيه المداح
لما اراد الله يظهر برك وضياك
ارسل ملاكه للاب انبا انطونيوس هناك
مشى لك يوم بتمام بيطلب رؤياك
فدخلت المغارة وقفلت الباب وراك
صرخ الانبا انطونيوس وقال لك با مبارك
قبلت اليك وحوش اقبلنى لاتبارك
سالت فاعطيت طلبت فوجدت
قرعت وانا اؤمن انه يفتح لى
لما جاء الغروب جه غراب و معاه
خبزايا كاملة لضيف الانبا بولا
قال له انت حبيبه لك دالة عند الله
لى سبعين سنة يرسل نصف خبزة
لما عرف القديس ان الوقت قد حان
يترك العالم والتعب والاحزان
قال للانبا انطونيوس ارجع ديرك الان
هات توب اثناسيوس حامى الايمان
وهو فى الطريق رجع بتوب اليقين
شاف ملايكة تتهلل ولروح البار حاملين
نال ابونا الاكليل بعد جهاد سنين
وكفنه بالثوب وبكى عليه بحنين
لما اراد دفنه اتبارك من جسده
وحالا جاء نمرين سجدوا امام جسده
وحفروا له مكان من بعد الاستئثان
على ربك اتكلت وما احتجت لانسان
طوباك طوباك طوباك عشت على الارض ملاك
الرب اختارك لما شاف قلبك
خدمتك الطيور وحوش تخضع بسرور
دفنتك النمور اسمك صار مزمور
طوباك يا جبيب ايسوس الرب بخرستوس
ربحت العشر وزنات اللى اعطاك القدوس
الوزنة الاولى كان عندك ايمان
ان الرب الديان يحفظ حياتك فى امان
الوزنة الثانية رجاء مع اطمئنان
الرب يعولك زى ما عال شعبه زمان
الثالثة محبة كاملة و محتجبة
كانت الاول حبة كبرت حبة بحبة
الرابعة احتمال عيشة بين الجبال
مين بس اللى قال ده من المحال
الخامسة ما رايت حيوان ابدا و خشيت
لكنك صليت نلت نعمة و قويت
السادسة سلطان على الطبيعة كمان
يا بتول طاهر بحب الهك شبعان
السابعة سامع وصايا الرب و خاضع
وايدك رافع جسدك كله خاشع
الثامنة هارب وللذات سالب
وبيسوع غالب على كل التجارب
التاسعة ممالك تركت لاجل الملك
فى طريقه سالك وعلى قلبك مالك
الوزنة العاشرة ما حلاكى يا وحدة
والثمرة الحلوة لذيذة وطعمة
من ذاقك تحلى له العيشة فى حاله
تتحسن احواله ويرتاح باله
طوباك طوباك طوباك فى السما ويا الهك
نلت النعيم هناك فرحان مع سيدك
انبا بولا يا امين اولادك محتاجين
صلواتك عنهم تحرسهم كل حين
طوباك با انبا بولا يا ساكن المغارة
صارت سماء ثانية بقيت لينا منارة
سيرتك شهية سيرتك نقية
سيرتك تقية لينا منورة
طوباك يا انبا بولا يا حبيب المسيح
يا ضياء منير وجهك حلو ومريح
صلواتك بلسم تشفى القلب الجريح
وصمتك اقوى من كل كلام فصيح

نشكر تعب محبتكم على الموضوع الجامد ده